轉自Yahoo Blog:團購彩繪工作坊體驗實錄

話說朋友知我中意做手工，3個月前見網上有$68畫畫+彩繪陶瓷公仔既團購，就叫埋我le個手工狂迷一齊去參加啦。
不過係囉~點解3個月前既野要拖到e+先去做呢可﹖﹗一日都係我之前份死人工累事囉﹗不過都過左去，唔好提啦.....都係講番今次參加既le個工作坊先啦﹗
今次整手工既地方係位於荃灣既Colour Jam，地址位處於響荃灣地鐵站行5分鐘點都行到去既時貿心。個度地方唔大，除左一個小小既接待處之外，全部都放好晒一個個畫架，上面有埋工具，一副隨時準備好比人創作既樣咁。
團購入面包左一幅畫同一隻陶瓷公仔，有2個半鐘比你畫。其實一去到個時個職員有問我地比唔比$加大個畫布架，不過我即刻就話:「唔使啦~我驚畫唔晒呀...」攪到本來比人講到心郁郁想加大既朋友好似一盤冷水照頭淋咁，當堂無晒心機。
我地去個日剛好係71，個場都幾full，又有好多家長襯住放假帶埋小朋友黎玩下，所以都幾「熱鬧」。好在朋友同我以前都響中心做child and family team，佢地嘈極都唔會夠中心功輔班個70個細路嘈，而且嘈d仲輕鬆d有氣氛d添啦^_^
由於前一日係last day所以同同事食宵夜食到成點幾兩點既關係，我係咩都無準備過架﹗當我面對住個張純白既畫布，個腦當然係同張畫布一樣-----一遍空白.......但本於「求其就是美」既精神，我比一早諗定畫咩好既朋友仲早落筆，同時更早完成，啱啱夠時間畫埋隻公仔 ( 不過真係畫得唔好，所以唔多講啦....)。
總括而言~$68可以玩2個半鐘又有兩件作品比你帶番屋企真係幾抵既，問題只係在於開心過後，你會發現你幫屋企加添左兩件廢物，仲要係放出黎又唔係收埋佢又唔係個隻播﹗
所以奉勸各位，諗清楚先參加啦..........

 

P.S. le幅畫最終放左響我床頭，希望佢生性唔好跌落黎撞親我個頭啦......

是日主理人﹕鄭二小姐